Your Purpose at Church: Worship
Okokuqala, futhi ngaphezu kwakho konke, ibandla likhona ukuze kukhonzwe futhi kudunyiswe uNkulunkulu. UNkulunkulu ukhethile futhi wabiza ibandla ukuba limemezele ubuhle nobukhulu Bakhe (1 Phethro 2:9) futhi libe ngukudunnyiswa kwenkazimulo yomusa Wakhe (Efesu 1:6, 12, 14). Nakuba wonke uMkhrestu kufanele akhonze uNkulunkulu kukho konke akwenzayo (1 Khorinte 10:31), uNkulunkulu uhlinzeke ngezimfanelo zekhethelo eziqondene nokukhonza okwamukelekile ebandleni ngengombuthano obumbene. Lezi zimfanelo ezilandelayo zinikezelwe ibandla ukuba lizenze ekukhonzeni kwalo uNkulunkulu ngokuhlanganyela.
- UMBhabhadiso: Umbhabhadiso kaJesu Khristu, noma “uMBhabhadiso woBukhrestu,” uyingxenye yoMyalo Omkhulu (Mathewu 28:18–20) owanikezwa abafundi ngaphambi nje kokuqala kwebandla kwiZenzo 2. UMBhabhadiso uyingxenye yokukhonza ngokuhlanganyela lapho ikholwa elisha livuma obala ukukholwa kwalo kuJesu Khristu (IZenzo 2:38) kanye nokuzihlanganisa kwalo nebandla (IZenzo 2:41).
- ISidlo seNkosi: ISidlo seNkosi, noma iSacramente, samiswa nguJesu Khristu (Mathewu 26:26–29; Makhu 14:22–25; Lukha 22:17–20) futhi sanikezwa ibandla ngoMphostoli uPawulu (1 Khorinte 11:23–26). Injongo yeSidlo seNkosi ukukhumbula iNkosi uJesu — ikakhulukazi ukufa Kwakhe nokubuya Kwakhe esikhathini esizayo.
- UMthandazo: IZenzo 1 no-2 ngokuphindaphinda ziveza indima ebalulekile eyadlalwa ngumthandazo ezinkonzweni zokukhonza zebandla lokuqala. KuZenzo 16:13 indawo yokuhlangana yamakholwa okuqala yabizwa ngokuthi yindawo yomthandazo. Umthandazo awusona nje isenzo sokukhonza esiyimfihlo noma esomuntu siqu kuphela, kodwa futhi uyisenzo lapho ibandla njengomzimba obumbene liza phambi kweNkosi ngokukhonza.
- Ingoma: Ebandleni leThestamente Elisha, ukuculwa kwamahubo, izingoma zokudumisa, nezingoma zikamoya kwakubhekiswe eNkosini njengesenzo sokuyikhonza (Efesu 5:19). Izingoma zaziphinde zicashunwe ngoba zisiza kakhulu ekukhumbuleni izinto ezinkulu uNkulunkulu azenzile (IZenzo 13:33). Ngakho-ke, ingoma yisenzo sokuzidalula sokukhonza uNkulunkulu ngokukhuluma Kuye ngokuqondile noma ngokungaqondile,lapho sibuyekeza futhi sikhumbula imisebenzi Yakhe emikhulu nobuNgcwele Bakhe.
- Ukunikela: Ibandla lokuqala lalibamba iqhaza elikhulu ekwenzeni iminikelo yezimali ebandleni ngenjongo yomsebenzi wenkonzo. Ibandla kufanele liqoqe iminikelo njalo (1 Khorinte 16:2) ukuze kuhlangatshezwane nezidingo zomzimba ngaphakathi ebandleni nasemazweni angaphandle (2 Khorinte 8:1–4, 13–14; IZenzo 6; 1 Thimothewu 5; Galathiya 6:6). Abangcwele kufanele banikele ngokukhululekile nangentokozo, njengoba umuntu ngamunye enquma enhliziyweni yakhe (2 Khorinte 9:6–7). Ngakho-ke, ukwenza iminikelo njalo ngokuhlanganyela ngomsebenzi weNkosi kuyisenzo sokukhonza uNkulunkulu ngenxa yokunakekela Kwakhe ezimpilweni zamakholwa kanye nokuvuma ukubaluleka komsebenzi weNkosi.
Ngaphezu kwalokho, uKhristu unike ibandla Lakhe imiyalelo ethile yokulawula ukuze kugcinwe ubunye ebandleni. Kuzo zonke izinto, akukho kholwa okufanele linike ibandla likaNkulunkulu isikhubekiso, kodwa kufanele liphokophelele ukukhonza abanye ukudlula lokho lona elizifunela kona (1 Khorinte 10:32–33). Konke ukukhonza ngaphakathi ebandleni kufanele kubhekiswe kuNkulunkulu, kubanjwe iqhaza yibo bonke abangcwele, kugeleze othandweni lukaNkulunkulu nolwabangcwele (1 Khorinte 13), futhi kwenziwe ngendlela ehlelekile nenokuthula (1 Khorinte 14:33).