A Better Reason to Learn From Scripture
Kusukela ngomzuzu wokuqala wokukholwa, imiBhalo Engcwele iye yathandwa futhi yahlonishwa yibo bonke abakholwayo. Lapho siqhubeka sifunda iZwi likaNkulunkulu, yilapho siqhubeka sizwa kakhulu ukuthi silidinga kangakanani iZwi likaNkulunkulu, futhi yilapho siqhubeka sifunda kakhulu kulo. Lokho umgqigqo obusisekile.
Kodwa mhlawumbe ukukhula kwakho othandweni lweBhayibheli sekufinyelele ezingeni lapho kungasabonakali khona inqubekela-phambili enkulu. Kungase kube nezizathu eziningi ezenza kube nezikhathi lapho ungasashisekeli khona iZwi likaNkulunkulu njengakuqala. Nokho, esinye sezizathu ezivame kakhulu ukuthi asisafisi ukufunda konke iZwi likaNkulunkulu elikushoyo ngenxa nje yokuthi nguNkulunkulu okhulumayo kulo.
Akuyona imfihlo ukuthi amabandla avame ukugcwala lapho kunohla lwezifundo ngomshado, ngoba abaningi bafuna ukwazi ukuthi imiBhalo ithini ngokuthuthukisa imishado yabo. Kodwa lapho lezo zifundo seziphelile, umshado ungakabi ngcono kakhulu, intshisekelo eZwini likaNkulunkulu iyancipha, futhi labo bashadikazi basala bengakayiqondi imbangela yangempela yezinkinga ezisezinhliziyweni zabo. Kungashiwo okufanayo nangezinye izihloko eziningi ezivusa intshisekelo yesikhashana kulawomakholwa angagxilile.
Kodwa kunesizathu esingcono kakhulu sokufunda eMBhalweni. Ungafundi kuphela lokho ocabanga ukuthi uyakudinga noma lokho okubukeka kukuthakazelisa. Kunesizathu esingcono kunaleso sokufunda eMBhalweni. Funda eMBhalweni ngenxa nje yokuthi iyiMiBhalo. Yiba nesifiso sokwazi konke okuseZwini likaNkulunkulu. Fundisa nabantwana bakho ukwenza okufanayo! Yiya kuyo yonke imicimbi ehlobene neBhayibheli ehlanganiswa yibandla lakho. Hamba ngenhloso yokufunda, hhayi ngoba uzwa sengathi uyakudinga, kodwa ngoba kuyinto uNkulunkulu akhuluma ngayo, ngakho-ke kubalulekile ukuba uyazi.
Kaningi yilabo abangakashadi kodwa abanokuqonda okuhle okungokweBhayibheli ngomshado abakwazi ukuqapha kahle abakholwayo abashadile ukuba baphile ngokwethembeka kulokho okufundiswa yiBhayibheli. Kuyilabo abangakaze bakhulise ngisho nengane eyodwa, kodwa abafundiswe kahle uMBhalo, abavame ukunikeza isikhuthazo esihle kakhulu kubazali asebekhathele futhi bedangele. Yilabo abanokuqonda okuqondile koMBhalo abahlale bengabeluleki abangcono kakhulu nabakholwayo abavuthiwe kakhulu, noma bengakabi nobudala obubabonise izinto eziningi noma ulwazi oluningi lwempilo.
Umhubi owabhala iHubo 119 wayekuqonda kahle lokhu. Uthando lwakhe olukhulu ngeZwi likaNkulunkulu, ngenxa nje yokuthi liyiZwi likaNkulunkulu, lwamenza waqamba le nkondlo emangalisayo. Kuyo uveza ukuthi usezuze ukuqonda okudlula okwabanamandla, abafundile, nabanolwazi. Lokho kungenxa yolwazi lwakhe loMBhalo. Wayelifundile iZwi likaNkulunkulu ngoba lalifanele ukufundwa. Ngaphambi kokuba ahlangabezane nezimo ezivame ukuphoqa abantu ukuba baphendukele eZwini likaNkulunkulu, wayesevele engumngane walawo maqiniso abusisekile.
Yeka indlela engiwuthanda ngayo umthetho wakho!
Uwukuzindla kwami usuku lonke.
Imiyalo yakho ingenza ngibe nokuhlakanipha okudlula izitha zami,
ngokuba ihlala inami.
Nginokuqonda okudlula bonke abafundisi bami,
ngokuba ubufakazi bakho buyikuzindla kwami.
Nginokuqonda okudlula abadala,
ngokuba ngigcina iziyalezo zakho.(AmaHubo 119:97–100)