By Usuku ngaphambi kokubethelwa esiphambanweni kukaJesu. Izigameko eziningi zalolusuku zenzeka sekuntambama okwenza ukuba ukuqulwa kwecala kuze kungenele kwizintatha kusa zangoLwesihlanu. Funda izigameko zalolusuku uqaphele ukuthi uJesu wayazi ukuba yini esizomehlela.
( Landela amavesi amakwe ngo* ukuze ufunde kafushane)
UJesu uthumela abanye babafundi ukuyolungisa isidlo sePhasika
Mathewu 26:17-20; Makhu 14:12-17; Lukha 22:7-16*
Lwase lufika usuku lwesinkwa esingenamvubelo, okufanele ukuba kuhlatshwe ngalo iPhasika. UJesu wathuma uPhethro noJohane, wathi: “Hambani niyosilungisela iPhasika ukuba sidle.”Bathi kuye: “Uthanda ukuba sililungisele kuphi na?” Wathi kubo: “Niyothi uma seningenile emzini, nihlangane nomuntu ethwele imbiza yamanzi; mlandeleni, niye endlini angena kuyo, bese nithi kumninindlu: ‘UMfundisi uthi kuwe: “Liphi ikamelo lezihambi engingadlela kulo iPhasika nabafundi bami, na?” ’ Lowo-ke uzakunikhombisa ikamelo elikhulu eliphezulu, elilungisiweyo; lilungiseleni lapho-ke.”Sebehambile, bafumana kunjengoba ayeshilo kubo, base belungisela iPhasika. Kwathi ukuba kufike isikhathi, wahlala phansi esidlweni, nabaphostoli benaye. Wayesethi kubo: “Bengilangazelela nokulangazelela okukhulu ukuba ngidle leliPhasika nani ngingakahlupheki. Ngokuba ngithi kini: angisayukulidla futhi, kuze kufezeke inhloso yalo embusweni kaNkulunkulu.”
UJesu ugeza izinyawo zabafundi
Johane 13:1-20*
Kwathi sekuzakuba nguMkhosi wePhasika uJesu azi ukuthi sesifikile isikhathi sakhe sokuba amuke kulo mhlaba aye kuYise, kepha wayebathandile abangabakhe abasemhlabeni kwaze kwaba sekugcineni.
Sekudliwa isidlo sakusihlwa, usathane wayesekufakile enhliziyweni kaJuda Iskariyothe kaSimoni ukuba amkhaphele. UJesu wayekwazi ukuthi uYise unikele konke ezandleni zakhe, nokuthi Yena wavela kuNkulunkulu, futhi ubuyela kuye. Wasukuma esidlweni, wabeka izingubo zakhe, wathatha ithawula, walibopha okhalo. Wayesethela amanzi emcengezini, waqala ukugeza abafundi bakhe izinyawo, ezesula ngethawula ayelibophele okhalo. Wayesefika kuSimoni Phethro. UPhethro wathi kuye: “Nkosi, Wena, ugeza izinyawo zami na?” UJesu waphendula, wathi kuye: “Engikwenzayo manje awukwazi, kodwa uzakuqonda emva kwalokhu.” UPhethro wathi kuye: “Awusoze wazigeza izinyawo zami naphakade.”
UJesu waphendula, wathi: “Uma ngingakugezi, awunasabelo nami.” USimoni Phethro wathi kuye: “Nkosi, makungabi yizinyawo zodwa, kodwa nezandla nekhanda.” UJesu wathi kuye: “Ogeziweyo kadingi lutho olunye, kuphela ukugezwa izinyawo, ngalokho umzimba wonke ugezekile. Nina-ke nigezekile, kodwa hhayi nina nonke.” Ngokuba wayemazi obezakumkhaphela, yingakho athi: “Anigezekile nonke.” Ngakho-ke esezigezile izinyawo zabo, wathatha izingubo zakhe, wabuye wahlala esidlweni, wayesethi kubo: “Niyakuqonda yini lokhu engikwenze kini na? Ningibiza nithi: ‘Mfundisi, Nkosi.’ Yebo, nisho kahle, ngokuba ngiyikho. Uma Mina, iNkosi noMfundisi, ngigeze izinyawo zenu, nani-ke kufanele nigezane izinyawo. Ngokuba ngininikile isibonelo sokuba nani nenze njengalokhu ngenzile kini. Ngiqinisile, ngiqinisile ngithi kini: isisebenzi kasingaphezulu komqashi waso, nothunyiweyo akangaphezulu komthumileyo. Uma nikwazi lokhu, nibusisiwe nxa nikwenza. “Angikhulumi ngani nonke, ngokuba ngiyabazi engibakhethileyo. Kepha ukuze kugcwaliseke umbhalo othi:
“ ‘Odla isinkwa sami ungiphendukele.’ “Kusukela manje ngiyanitshela kungakenzeki, ukuze nxa sekwenzeka, nikholwe ukuthi ngiNguye. Ngiqinisile, ngiqinisile ngithi kini: owamukela noma ngubani engimthumileyo, wamukela Mina; owamukela Mina, wamukela ongithumileyo.”
UJesu udalula umkhapheli
Njengendaba yokungena eJerusalema ngembongolo, lesigameko ziqoshwe kuzona zozine izincwadi ezichaza kabanzi ngempilo kaJesu emhlabeni
Mathewu 26:21-25; Makhu 14:18-21; Lukha 22:21-23*; Johane 13:21-30
Kepha isandla songikhaphelayo sinami lapha etafuleni. Ngokuba iNdodana yomuntu izakufa njengokumisiweyo, kepha maye, kulowo muntu ekhashelwa ngaye!” Base beqala ukubuzana bodwa ukuthi ngabe ngubani kubo ozakukwenza lokho.
Abafundi baphikisana ngokuba ngubani omkhulu kubona
Lukha 22:24-30*
Kwaqubuka nempikiswano yokuthi ngubani phakathi kwabo okungathiwa mkhulu. UJesu wayesethi kubo: “Ababusi bezizwe bazithwalisa kanzima izizwe, nalabo abayiziphathimandla babizwa ngokuthi ngabenzi bokuhle. Kepha akunjalo kinina; kodwa omkhulu kini, makabe njengomncinyane; nongumholi, abe njengesisebenzi. Ngokuba ngubani omkhulu, ngabe ngohleli elindele ukunikwa ukudla noma yisisebenzi esiphakayo na? Akusiye yini ohlezi esidlweni na? Kepha Mina ngiphakathi kwenu njengesisebenzi. Nina-ke benilokhu ninami ekulingweni kwami. Njengalokhu uBaba enginikile umbuso, nami ngininika wona, ukuze nidle, niphuze etafuleni lami embusweni wami. Niyakuhlala ezihlalweni zobukhosi, nibuse izizwe ezili-12 zakwa-Israyeli.”
UJesu ubikezela ngokumphika kukaPhethro
Lukha 22:31-38*; Johane 13:31-38
“Simoni, Simoni, lalela la; uSathane unicelile ukuba anihlunge njengokolweni. Kepha Mina ngikunxusele ukuba ukukholwa kwakho kungapheli. Wena-ke, uma usuphendukile, uqinise abafowenu.” Kepha wathi kuye: “Nkosi, ngikulungele ukuya nawe ejele nasekufeni.” UJesu wayesethi: “Ngiyakutshela, Phethro, ukuthi iqhude aliyukukhala namhlanje, ungakangiphiki kathathu ukuthi awungazi.” Wayesethi kubo: “Mhla nginithuma ningenasikhwama semali, nasikhwama sokwethekela, nazicathulo, ngabe kukhona yini enakweswelayo na?” Bathi: “Qha.” Wayesethi kubo: “Kepha manje onesikhwama semali makasithathe, kanjalo nonesokwethekela; ongenankemba makathengise ngengubo yakhe, ayithenge inkemba. Ngokuba ngithi kini: kufanele ukuba kugcwaliseke lokho okulotshiweyo ngami, ukuthi: ‘Wabalwa kanye nezelelesi;’ ngokuba lokho okulotshiwe ngami, sekuyafezeka.” Base bethi: “Nkosi, bheka, nazi izinkemba ezimbili.”
Wathi kubo: “Kwanele.”
intshumayelo ongayilalela: ngokukaLukha 22:21-34 “Wordly vs Christian Greatness”
itholakala ngesizulu kwikhasi laseLHBC
Ukuphela kwesidlo sePhasika nokumiswa kweSidlo seNkosi
Mathewu 26:26-29; Makhu 14:22-25; Lukha 22:17-20*; qhathanisa no- 1 Khorinte 11:23-26
Wathabatha indebe, wabonga wathi: “Thabathani lokhu, nabelane; ngokuba ngithi kini, kusukela manje angisayukuphuza kulesi sithelo somvini, kuze kufike umbuso.” Wayesethabatha isinkwa, wabonga, wasihlephula, wabanika sona, ethi: “Lokhu kungumzimba wami onikelelwe nina; yenzani lokhu ukuba ningikhumbule.” Kanjalo-ke wathabatha nendebe sebedlile, wathi: “Le ndebe iyisivumelwano esisha egazini lami elithululelwa nina.
intshumayelo ongayilalela: ngokukaLukha 22:7-20 “Why We Do not Observe the Passover”
itholakala ngesingisi kwikhasi laseLHBC
UJesu ulungisela abafundisa ukuhamba Kwakhe
Johane 14:1-17:26
UJesu nabafundi ensimini yaseGetsemane
Mathewu 26:30-35*; Makhu 14:26-31; Lukha 22:39-40; Johane 18:1
Sebehlabelele iculo lokubonga, baphuma, baya eNtabeni Yeminqumo. UJesu wathi kubo: “Nina nonke nizakukhubeka ngami ngalobu busuku, ngokuba kulotshiwe ukuthi: ‘Ngiyakushaya umalusi, izimvu zomhlambi zihlakazeke,’ kodwa emva kokuba sengivusiwe ngiyakunandulela ukuya eGalile.”
UPhethro waphendula, wathi kuye: “Noma bonke bangakuhlamuka, mina angisoze ngakushiya.” UJesu wathi kuye: “Ngiqinisile ngithi kuwe: ngalobu busuku, ngaphambi kokuba iqhude likhale, uzakungiphika kathathu.” UPhethro wathi kuye: “Noma ngabe kufanele ukuba ngife nawe, angisoze ngakuphika.” Bonke abafundi basho kanjalo.
intshumayelo ongayilalela: ngokukaLukha 22:35-51 “Jesus’ Spiritual Survival Plan”
itholakala ngesingisi kwikhasi laseLHBC
UJesu uyakhuleka eGetsemane
Mathewu 26:36-46; Makhu 14:32-42; Lukha 22:40-46*
Kuthe esefikile lapho, wathi kubo: “Khulekani ukuze ningangeni ekulingweni.” Wayesesuka kubo ibanga elingangokuphonsa itshe, waguqa phansi, wakhuleka, wathi: “Baba, uma uthanda yisuse kimi le ndebe, nokho kungabi ngokwentando yami, kube njengokuba kuthanda wena.” Kwabonakala kuye ingelosi ivela ezulwini, imqinisa. Esosizini olunzima, wakhuleka eqinisela, izithukuthuku zakhe zaze zaba njengamathonsi egazi econsela emhlabathini.Esesukumile ekukhulekeni, waya kubafundi bakhe, wabafica belele, ngokuba babedabukile kakhulu. Wathi kubo: “Nilaleleni na? Vukani nikhuleke ukuba ningangeni ekulingweni.”
UJesu wakhaphelwa, waboshwa, wabayedwa
Mathewu 26:47-56; Makhu 14:43-52; Lukha 22:47-53*; Johane 18:2-12
Esakhuluma, kwatheleka isixuku siholwa nguJuda, omunye wabali-12, wasondela kuJesu ukuba amange. Kepha uJesu wathi kuye: “Juda, uyayikhaphela iNdodana yomuntu ngokuyanga na?” Sebebonile ababenoJesu okuzakwenzeka, bathi: “Nkosi, sigadle yini ngenkemba na?” Omunye othile kubo wagalela inceku yomphristi omkhulu, wayinquma indlebe yakwesokunene. Kepha uJesu waphendula wathi: “Yekani; sekwanele!” Wayithinta indlebe yayo, wayelapha. Wathi uJesu kubaphristi abakhulu, ezinduneni zethempeli, nakumalunga ababeze kuye ukuzombopha: “Niphume niphethe izinkemba nezagila sengathi nize kumphangi na? Benginani imihla ngemihla ethempelini, anelulanga zandla ukuba nimelane nami, kepha manje yithuba lenu leli, namandla obumnyama.”
UJesu ulethwa ukuba azothetha icala phambi kukaAnnas beni Kheyifasi
Mathewu 26:57-68*; Makhu 14:53-65; Lukha 22:54
Labo ababembambile uJesu bamyisa kuKhayifase, umphristi omkhulu, lapho kwakubuthene khona izazimthetho namalunga. Kepha uPhethro wamlandela uJesu ebuqamama, kwaze kwaba segcekeni lomphristi omkhulu. Naye wangena ngaphakathi, wahlala phansi nezikhonzi ukuze abone isiphetho. Abaphristi abakhulu nomkhandlu wonke bafuna ubufakazi obungamanga ngoJesu, ukuze bambulale. Kepha ababutholanga, nakuba kwase kufike ofakazi abaningi bamanga. Kodwa kamuva kwavela ababili, bathi: “Lo wathi: ‘Nginamandla okudiliza ithempeli likaNkulunkulu, ngibuye ngilakhe ngezinsuku ezintathu.’ ”Kwase kusukuma umphristi omkhulu, wathi kuye: “Awuphenduli ngalutho kulokhu abakufakaza ngawe na?” Kepha uJesu wathula du. Umphristi omkhulu wayesethi kuye: “Ngikufungisa uNkulunkulu ophilayo ukuba usitshele uma unguKhristu, iNdodana kaNkulunkulu.” UJesu wayesethi kuye: “Usho khona. Nokho ngithi kini: kusukela manje niyakuyibona iNdodana yomuntu ihleli ngakwesokunene saMandla, iza ngamafu ezulu.” Umphristi omkhulu waklebhula izingubo zakhe, wathi: “Usehlambalazile; sisabadingelani ofakazi na? Nani senizizwele ngezindlebe zenu ehlambalaza. Pho nithini ngalokhu na?” Baphendula bathi: “Ufanelwe ngukufa.” Base bemkhafulela ngamathe ebusweni, bamdushuza, abanye bammukula, bathi: “Siphrofethele, Khristu; ngubani okushayileyo na?”
Ukuphika uJesu kukaPhetro
Mathewu 26:69-75; Makhu 14:66-72; Lukha 22:55-56; Johane 18:25-27*
Kepha uSimoni Phethro wayemi, otha. Bathi-ke kuye: “Ngabe impela nawe awusiye yini omunye wabafundi bakhe na?” Waphika wathi: “Angisiye.” Enye yezinceku zomphristi omkhulu, eyisihlobo salowo ondlebe yaso uPhethro wayeyinqumile, yathi: “Angikubonanga yini ensimini naye na?” UPhethro wabuye waphika; masinyane lakhala iqhude.
intshumayelo ongayilalela: ngokukaLukha 22:52-65 “The Forces of Darkness”
itholakala ngesingisi kwikhasi laseLHBC