God can save the worst
Abasindisiwe ngokweqiniso yilabo abaphokophelela ukulunga, uthando, kanye nobungcwele. Abakanjalo bawuphawu lwabaphendukile ngokoqobo (1 ngokukaJohane 2:29; ngokukaJohane 13:35; Levithikhusi 20:26). Kodwa abalungile, abangcwele abalungile, abanothando abaphokophelela ubungcwele babengahlezi benjalo. Bonke, ngaphambi kokuphenduka, babenenhliziyo, ingqondo, umphefumulo okwakuphihlika isono. Abanye babo babekugqiba konke ngengaphandle elithandekayo, abanye babengayenzi leyomizamo. Amanye amadoda nabesifazane bakaNkulunkulu abahlonishwayo bengakakholwa babengabantu abonakele ngokwedlulele.
Awucabange ngeNkosi uNebukhadinezari. Ukuzikhukhumeza okukhulu kwakuyindlela yakhe yokuphila. Wayeyindoda ecebe kakhulu futhi eyayenze izinto eziningi ezinkulu emkhakheni wokwakha, wezempi, nasekubuseni, ngakho yazibona ifanele ukuziqhenya. Wayeziqhayisa ngokuceba kwakhe ngendlela okufanele yenze wonke umuntu onengqondo athuthumele. Kodwa uNkulunkulu wamsindisa, waguqula ukuzikhonza yena ngokweqile kwaba ukukhonzwa kukaNkulunkulu esidlangalaleni. Indaba yakhe itholakala kuDaniyeli 4.
Noma cabanga abanye abakhonzi bezithixo abaphenduka baba abakhonzi bakaSimakade. U-Abrahama, isibonelo esivelele sokukholwa (Joshuwa 24:2), uRuthe, ugogo omkhulu weNkosi uDavide (Ruthe 1:15–16), kanye namaThesalonika, elinye lamaqembu amakholwa aqine kakhulu eThestamenteni Elisha (1 Thesalonika 1:9), bonke bangabantu abake bakhothamela izithixo ngaphambi kokuba uNkulunkulu abasindise.
Ngokuqinisekile singengeza abanye “abayizoni ngokusobala” ohlwini lwabantu ababi kakhulu uNkulunkulu abasindisa. URahabi, isifebe (Hebheru 11:31), uManase, umbusi ononya (2 IziKhronike 33), noSawulu, umbulali wabantu abaningi (Galathiya 1:13), bonke bamukela umusa wokuthethelelwa izono.
Kungemuva kokubizwa kukaMathewu ‘isoni esisobala’ lapho uJesu akhuluma lamazwi maqondana nensindiso:
Abaphilileyo abayidingi inyanga, kodwa ngabagulayo kuphela…..Ngokuba angizanga ukuzobiza abalungileyo, kodwa izoni.
ngokukaMatthewu9:12-13