By Isono, isono. Ukuthi uyakholwa noma awukholwa akushintshi lutho lokho. Kuke kwenzeke abantu abangakholwa, bezwe ngemuva lakho ungakakholwa kuNkulunkulu bathi uma bezwa ukuthi wawenza izinto ezisekhona empilweni yabo bese bethi ‘ngiyakuthanda wena ngoba awuvelanga wakholwa, kodwa uyazazi izinto’; kokunye bathi ‘ave liright ikholwa eliqale laphila impilo’ kuningi okunye okushiwoyo. Abantu bejabulela ukuthi nawe okholwayo uke wadlebeleka njengabo.
Nakhu ekumele sihlezi sikukhumbula, ngaphezu kokuba uNkulunkulu ezithalalisa izikhathi zokungazi, ukwenza inkohlakalo akukaze kwamukeleke kuNkulunkulu. Akukaze kwamukele ukuphula imithetho kaSimakade. Ayikho into engcono nencomekayo ngokona kuNkulunkulu Ongcwele. Akukaze kwalunga ukuthi siyizoni. Uma izwi kwabaseRoma 3:23 “ngokuba bonke bonile basilalelwe yinkazimulo kaNkulunkulu” akusona isincomo leso, kodwa kuvezwa ubhubhane abantu bonke abangaphansi kwalo ngenxa yokungalaleli kwabo!
Indlela esasiphila ngayo singakakholwa ikanje “….enanifile ngeziphambeko nangezono zenu, enanikade nihamba kuzo ngokwendlela yalelizwe..” kwabaseEfesu 2:1
Iziphambeko nezono zethu esasihamba kuzo, ubumnandi nokuba sezintweni konke kufakazela into yinye, ukuthi sasifile. Okungukuthi ayikho ingxenye yethu eyayinendima elungile ngokwezinga lokulunga elamukelekile kuNkulunkulu. Besihlukene nakho konke ukulunga, ngokucabanga, ngokwenza, ngezindlela zonke. Ubuhle nokulunga esasinako bekuyizinga lokuphilisana nabantu emhlabeni, elamukelekile kubantu, kodwa hhayi kuNkulunkulu. Bekufana nezithukuthuku zenja maqondana nokulunga okwamukelekile kuNkulunkulu.
Nalu uhambo ebesihamba ngalo, besingabalandeli bo “…mbuso wamandla omkhathi”. Izimpande zempilo ebesiyiphila nazi la ebezikhona, besingabalandeli bakasathane. Ingqondo yethu, singakakholwa ingakuphika lokhu, kungani? Ngoba vele ukucabanga kwethu bekuluthekile, ukusebenza kwayo bekumelene nayo yonke into kaNkulunkulu (KwabaseRoma 1:21). Nansi into ebesiyiyo … “…sasingabantwana bolaka….” Usuku nosuku intukuthelo kaSimakade ibiphezu kwezimpilo zethu.
Kuyinike okujabulisayo, okungafanele kulethe izincomo kulezizindlela esasizihamba?
Masimubonge uNkulunkulu ngomusa Wakhe wokusibekezelela ( 2 KaPhethro 3:8-9). Yilokho kuphela okwasisindisa ukuthi ulaka Lwakhe lungehli ngokugcwele ngaso lesosikhathi, ukuthi Yena wasibekezelela.
Masibazise nabahlobo bethu ukuthi akukho ukutusa okumele kube khona, kodwa mababone umusa wokubekezela kukaNkulunkulu, bakholwe kwiNkosi uJesu, ngoba iNkosi “ingathandi ukuba kubhubhe namunye, kodwa ukuba bonke beze ekuphendukeni”