Baningi kakhulu abantu emlandweni uwonke ababe negalelo elihle empilweni nasezimpilweni zabantu. Okungenxa yabo kubekhona ushintsho ezimpilweni zabanye abantu. Ngokunjalo nasemakhaya esiphuma kuwona, kubangani esinabo, lukhona loluhlobo lwabantu abanobuqhawe ezimpilweni zethu. Okuba buhlungu ekujuleni kwenhliziyo uma sekufika isikhathi sokuthi badlule empilweni yasemhlabeni. Kunamazwi esithi uma sibheka igalelo labo ezimpilweni zethu siwabone ukuthi abafanele. Lamazwi ayashiwo ngosuku lokugcwatshwa kwabo, kwenye inkathi umasigcwabisane awabhale kwisiqeshana sephepha elibhalwe umlando wabo, lamazwi athi:
“Ngikulwile ukulwa okuhle, ngiliqedile ibanga….”
2 kuThimothewu 4:7
Lamazwi mahle ukuwasho ngomuntu obenomsebenzi omuhle awenzile. Kodwa nakhu ekumele sikuqaphelisise, akusiyona yonke imisebenzi emihle, elethe ushintsho oluhle, yaba nomthelela omuhle engena ngaphansi kokulwa ekukhulunywa ngakho kulamazwi.
Owawakhuluma lamazwi, uPawuli, uke wathi uma ebuka amagalelo abe nawo empilweni, eyilunga lezenkolo elethembekile neliqavile, eliqeqeshekile ngaphansi kwabantu abahlonishwayo( IZenzo 22:3, KwabaseFiliphi 3:4-6),wakubuka konke lokhu wabe esethi
“Kepha lokho okwakuyinzuzo kimi ngakushaya indiva ngenxa kaKhristu….ngenxa yobukhulu bokumazi uJesu Khristu iNkosi…..ngikushaya izibi ukuze ngizuze uKhristu….”(kwabaseFiliphi 3:7-8). Imisebenzi yonke ayengazigqaja ngayo eyayimihle, uma ithemba lakhe eselibeke kuJesu wabubona lobubuhle balemisebenzi ukuthi “izibi”.
Okungukuthi uma ethi “ngikulwile ukulwa okuhle…”akayibali yonke lemisebenzi emihle kangaka abedume ngayo.
Uma esezoficwa ngukufa ngemuva kweminyaka ehambisa ivangeli, umsebenzi wokuphakanyiswa kwegama leNkosi wenza izinto ezimbili
Uqala ngokubheka isizukulwane esiza ngemuva kwakhe kulomsebenzi wokushunyayelwa kweVangeli, uthi kusona “shumayela iZwi….kuyisikhathi noma kungesiso” ( 2 KuThimothewu 4:2,5)
Ube esebheka uhambo lwakhe aluhambe eshumayela udumo lweNkosi uJesu, engazihambeli nje ukuthi aziwe njengonamagalelo amahle ebantwini. Uma ebheka emuva, ebheka uhambo lwakhe oluphakamisa iNkosi uJesu, kwafika amazwi athi “ngikulwile ukulwa okuhle, ngiliqedile ibanga lami, ngikugcinile ukukholwa” ( 2 kuThimothewu 4:7)
Ngenxa yobukhulu bokumazi uKhristu, ubala kuphela imisebenzi ephakamisa iNkosi uJesu Khristu njengokulwa okuhle. Futhi uphinde aqinise akhuthaze nesizukulwane esiza ngemuva kuloluhambo neNkosi ukuthi asiyibambe, asilwe “ukulwa okuhle” ( 2 kuThimothewu 4:5)
Masikuqaphele lokhu, akusiwo wonke amagalelo ethu kulokhu kuphila angukulwa okuhle. Kuphela lawo aphakamisa uKhristu. Akusiye wonke umuntu iqhaza lakhe elibalwa ngaphansi kokulwa okuhle.Ngakho kholwa kuKhristu, impilo yakho uyibophezele ukuba ibonakalise ubukhulu Bakhe, khona nawe uyothi uma uyibuka impilo yakho ufakaze ukuthi
“Ngikulwile ukulwa okuhle, ngiliqedile ibanga, ngikugcinile ukukholwa..”