By Isikhathi esiningi inkulumo “izinto zami noma zakhe” imataniswa noma kusuke kushiwo ubudlelwano bomuntu nobe”dlozi” lakhe, (noma umuntu wakubo osedlulile empilweni yase mhlabeni) okuyilo okuthiwa livula iminyango “izinto zakhe zimhambele kahle” noma livale iminyango “izinto zakhe zingamhambeli kahle”, lokho okuveza isimo somsamo waloyo ophilayo ukuthi uyakhanya noma cha. Lokho okuholela kumbuzo othi, ngakube impilo yomuntu ophilayo incike kumuntu oseshonile na? ngabe unamthelela muni osefile phezu kwempilo yophilayo?
Lenkulumo sizoyibheka ngokuhlakanipha uNkulunkulu asimbulele kona maqondana nempilo yangaphansi komthunzi welanga. Uma sifunda incwadi yoMshumayeli isahluko 9:5 sithola ukuthi:
“….kodwa abafileyo abasazi lutho, futhi abasenamvuzo; abasakhunjulwa nakukhunjulwa”
UMshumayeli 9:5
Uma umuntu esefile akukho ukuqhubeka athuthuke ngolwazi lwempilo yasemhlabeni “kodwa abafileyo abasazi lutho”. Futhi akukho asangaphinde avuze ngakho okwempilo yangaphansi komthunzi welanga “futhi abasenamvuzo”. Awusekho umfutho abasangawufaka ukuze baqhubeke bavuze. Impilo ngaphansi komthunzi welanga iyaqhubeke ngendlela efanayo khona sebengasekho “abasakhunjulwa nakukhunjulwa..”.
“Kubo uthando, nenzondo nomona sekuphelile, abasenaso isabelo nanini kukho konke okwenziwa ngaphansi komthunzi welanga”
UMshumayeli 9:6
Ngisho nemizwa yabo ayisakhuthazeli kwizinto ezenzeka noma ezenziwa phansi komthunzi welanga. “Kubo uthando nenzondo nomona sekuphelile,” Bonke ubudlelwano ebebenabo nabaphilayo abasakwazi ukuqhubeka babenomthelela kubona.
“ …abasenaso isabelo nanini kukho konke okwenziwa phansi komthunzi welanga” kukona konke okuyisabelo salokhu kuphila kwasemhlabeni sebehlukene unomphela nakho, ngisho kungathiwa kwakuyinzuzo yezikhwepha zabo ababe nayo besaphila. Kumbe okwenziwa ngabaphilayo ukuba kufinyelele kubona “ngale”, ngakube izenzo, kungabe ukudla okwenziwa ngenhloso yokuthi badle, noma amazwi aphimiselwayo esimweni sama “heavenly birthday” noma imikhuleko eyenzelwa bona, konke okusuka kwabaphilayo kuqondiswe kubona akufinyeleli kubona “abasenaso isabelo nanini kukho konke okwenziwa phansi komthunzi welanga…”
Maqondana nomthelela kulomhlaba wabahlobo bethu asebasishiya, okokuqala ekumele sikubeke emqondweni ukuthi:
Yebo, umuntu uma eseshonile umphefumulo wakhe usuke usakhona, kodwa ususezandleni nasezinhlelweni zikaNkulunkulu okunguye umenzi wokuphila konke( AmaHebheru 9:27). Kodwa maqondana nempilo yasemhlabeni bonke asebasishiya emhlabeni
“abasenaso isabelo nanini kukho konke okwenziwa phansi komthunzi welanga…”